Сыктывдiн районса Ыб сиктö волiс нималана коми гижысь, прозаик, драматург Öльöксей Попов. Челядь и олöма йöз виччысисны сiйöс сиктса школаын да библиотекаын.
Ыбса шöр школаын аддзысьлiм ичöт класса велöдчысьяскöд. Найö первойсö весиг эз эскыны, мый на водзын гижысь. А сэсся кутiсны юасьны, мый вöчö гижысь, кыдзи олö. Алексей Вячеславович пасйис, мый гижысьыд разнöй вöвлö. Морт, кодi гижö кывбуръяс – тайö поэт, кодi гижö висьт-повесьт – писатель, а кодi гижö пьесаяс – тайö драматург. Тi водзын пö писатель да драматург, кывбуртö ог пö куж лöсьöднытö, сьывны-йöктыны ог жö. Бур, лада сёрниыд ичöт мортлысь сьöлöмтö вöрзьöдiс, эз кутны повны юасьнытö. Бöр вылас висьталiсны, мый налы кажитчис гижысьыд, вöлöмкö и «Би кинь» журналтö лыддьöны и. Öтик нывка висьталiс, мый гортас локтö журналыс. Велöдыськöд öтшöтш найö кöсйысисны журналö мöдöдны ассьыныс уджъяс.
А сэсся неуна сёрмыштöмöн локтiм ыбса лыддьысянiнö, танi и збыль виччысисны. Марина Геннадьевна Колегова дасьтöма небöга выставка, юргисны сьыланкывъяс.
Ставлы окота вöлi ассьыс мыйкö юавны – кыдзи сюрöны сюжетъяс, ёна-ö дыр гижö öтик пьесасö, кодi вуджöдö роч вылö, кажитчис-ö «Сюр» спектакльыс пранцузъяс ворсöмын – быд юалöм вылö гижысь сетiс воча кыв. А уна жö серамысь синва киссис – быд висьтасьöмын теш, и гаж, и серам. Тешкодь вöвлöмторъяс челядьдырсянь гартчöмаöсь гижысь олöмын, быттьö кодкö сетö вöлi найöс – то пö, кут тöд вылад. И сiйö öктiс найöс юрас – сэсся и гижöдö водiс. Но нэм чöжыс казьтывлö медводдза наставниклысь, Иван Григорьевич Торлоповлысь, кывъяссö – быд анекдотысь оз на артмы висьт.
Кыдзи пасйис библиотекарь Марина Геннадьевна, медся ёна сиктса войтырлы сьöлöм вылас воисны гижысьлöн томдырся олöм йылысь казьтылöмъяс. Синва петтöдз сералìм. А вöлöмкö, гижысь юксис «Одеяла алкашам не положено» пьесаысь юкöнöн.
Сьöлöмсянь аттьöалам енбиа мортöс – Алексей Вячеславович Поповöс Ыб сиктö волöмысь, мый сìйö оз вунöд сиктса лыддьысьысьясöс. Сиам Алексей Вячеславовичлы кузь нэм да бур шуд да ун-уна пьеса да висьт.
Людмила Муравьёва, Выльгорт сиктса Шöр библиотекаын методика юкöнöн веськöдлысь
Марина Колегова, В.И. Безносиков нима Ыбса библиотека-филиалöн веськöдлысь
