Бур ёртöс, пыдди пуктана Велöдысьöс,
Владимир Тиминöс казьтылöм…
Эм йöз, кодъяс кольöны сьöлöмад нэм кежлö. Ас йöз. Гöгöрвоысь, ышöдысь, сьöлöм шонтысь… Татшöмöн меным вöлi Владимир Васильевич Тимин.
Владимир Васильевичкöд ми тöдмасим 2001-öд вося лöддза-номъя тöлысьö, Том гижысьяслöн гожся университетса художествоа гижöд творческöй лабораторияын. Сэк мен вöлi 17 арöс. Ме сöмын на помалi Искусствояс гимназия, сдайтi экзаменъяс, пыри велöдчыны Сыктывкарса канму университетö, фин-йöгра факультетö… Вöлi томиник, шуда ныв. Нинöмысь эг пов. Окота вöлi ставсö тöдмавны, аддзывны, кывны… А Владимир Васильевич меным отсалiс – восьтiс поэзияö туй. Мен уси ыджыд шуд велöдчыны куим во чöж Владимир Тимин дорын.
25 во сайын сiйö лоис меным бур ёртöн, Велöдысьöн, а бать кувсьöм бöрын – бать пыдди… Унаысь ме пыравлывлi Печать керкаö, Гижысь котырö. Юкся вöлi выльторъясöн, сьöкыдлунъясöн. Тшаюйтам Владимир Васильевичкöд да Елена Васильевнакöд, сёрнитам, и быттьö бара выль вынъясöн, югыд мöвпъясöн муна общежитиеö.
«Настя, тэ вылö миян ыджыд надея – быдмы классикöдз. Бур туй литератураö!» - В.В.Тиминлöн да Е.В.Козловалöн кывъясыс.
Университет помалöм бöрын вуджи овны Удораö. Аддзысьлöмъяс лоисны гежöдджыкöсь. Гижи письмöяс аслам Велöдысьлы. Некор эг вунöдлы Владимир Васильевич йылысь. И пыр волiс меным вочакыв:
«Гиж водзö и унджык. Эн кöдзöдчы. И бöр ло «на виду». Эн вош. Тэнад ставыс артмас..»
«Лыдди. Зарава кодь сöстöм кывбуръяс. Меным нимкодь, мый творческöя быдман. Чайта, унатор на олöмсьыс йиджас тэö и ышöдас выль кывбуръяс гижны. Лыддьысьысь да донъялысь миян эм. Гиж. Тэнад артмö…»
Татшöм кывъяс бöрад, дерт, окота вöлi гижны… И овны… И лоны шудаöн…
Кор кывлi Владимир Васильевичлöн кувсьöм йылысь, бöрдi да бöрдi. А сэсся чужис татшöм кывбур:
Тэ вöлiн коми
Кывнад, рунад,
Шань сьöлöмнад и уджачлуннад.
Тэ пуктiн пай,
Мед чужан кывйыд
Босьтiс ставöс аслас сывйö.
Тэ – менам велöдысь да ёрт,
Гарьяысь петлöм Ыджыд морт.
Тэ лёктор некодлы эн вöч,
Быд уджын вöлiн смел да стöч.
Тэ – Коми мулöн коми пи,
Нимйöза гижысь, югыд би.
Со неважöн Енэжö кайин
И овмöдчин, ме тöда, райын.
Аттьö тэныд, менам дона Велöдысь, тöдöмлунъясысь, гижан туй восьтöмысь, быд здукö гöгöрвоöмысь да сьöкыд лунъясö отсалöмысь.
«Настя - тэ миян будущöй Министр культуры!» - шулывлiс Владимир Васильевич. Министрöн, дерт, эг ло, но коми кывнымöс видза, сöвмöда да лелькуйта, кыдзи менö велöдiс-ышöдiс менам дона Велöдысь.
Анастасия Бушенева.
Удора район, Кослан сикт












